旅遊界立法會議員謝偉俊（Paul）近排忙住高鐵戰役，差啲唔記得自己生日添！阿Paul尋日五十一歲生日，佢竟然尋日先至醒起，臨時以短訊通知三五知己共同慶祝。仲話呢個歲數係佢「少年成長嘅開始」添！正一頑童本色。
阿Paul嘅短訊好搞笑，「嘻嘻！忙完高鐵戰役，忽然想起今天廿一日是我少年成長的開始（五十一歲），四十而立，五十應成器……」古訓話三十而立，阿Paul就遲咗人哋十年，五十應該要知天命啦，佢就啱啱成器嘅啫，真係畀佢激死！
阿Paul嘅抵死短訊最終吸引咗廿幾個朋友，有啲嚟自旅遊界，有啲係私人朋友。佢嘅紅顏知己白姐姐梗有到場，但就「空手到」，話原本想送生日禮物嘅，但唔見咗喎。
人生啱啱進入少年期嘅阿Paul，生日願望梗唔使青春常駐、長命百歲，估唔到佢又突然正經，願望竟然係「香港有優質文明的民主」。