黑英喺網誌表示「退休後本來決定絕足時事」，不過偶爾發現有勢力人士想藉發展之名喺塱原濕地起屋，仲成功迫使政府部門將當地規劃為綜合發展地區。佢狠批，以前起落馬洲支線時，政府已經裁定塱原有極高生態價值，依家如果允許建屋，做法「荒謬」。

林鄭強硬反擊

一向畀外界形容為「好打得」嘅發展局局長林鄭月娥尋日出席記者會講強制驗樓，被記者問到點睇黑英嘅批評時，新聞官原本以「只講強制驗樓」為由幫林鄭擋咗條問題，點知佢竟然搶白話：「呢條我可以答」，之後以強硬態度直斥黑英嘅質疑「荒謬」：「話規劃署受有力人士影響對我哋嘅同事唔尊重……今日嘅政治環境同社會，唔應該隨便提出啲冇理據嘅說話﹗」林鄭雖然好勇猛咁為政府護航，不過睇番佢上年尾三度喺公開場合拒絕交代政府對問題骨灰龕執法詳情，再對照番佢尋日嘅表現，點解有咁大差距？

其實呢幾年「發炮」抨擊政府嘅退休高官可謂前仆後繼，遠有「鐵蝴蝶」任關佩英、「重炮手」王永平、港英年代曾任副布政司嘅馬會主席陳祖澤同自命「政策判官」前申訴專員戴婉瑩，依家再加埋黑英，個個都有嗰句講嗰句，批評政府冇面畀，不如佢哋諗吓組成「退休高官唱衰政府合唱團」，以另類方式監察政府施政。