上水河上鄉路前日發生奪命車禍，捨身救子嘅慈母被撞到一命嗚呼，大家可能會對肇事貨車司機吹鬚睩眼怒吼：嘩，你點揸車o架！搞乜鬼害到人哋家散人亡呀！

事隔一日，另一宗人間慘劇又出現。有一位三十七歲孕婦喎，去年十二月二十八日曾經喺母嬰健康院接種過人類豬型流感疫苗，點不知，尋日喺屯門醫院證實胎兒宮內死亡。功夫茶有少少衝動近距離對準醫療高官耳仔邊怒吼：嘩，你點打針o架！搞乜鬼害到人哋胎死腹中呀！

大家或者會好冷靜咁話，定啲嚟定啲嚟，唔好咁衝動住，注射疫苗未必一定同胎死腹中有關嘅，可能純屬巧合啫。大家有所不知，功夫茶慶就慶在，注射豬流感疫苗出現嚴重副作用已經唔係第一次o架啦，之但係特區政府醫療高官從來冇講清楚邊類人士屬於高危一族。家陣咪死火囉，有人矇查查打針，然後無辜辜流產，小寶寶夭折得不明不白。

衞生署衞生防護中心發言人話喎，目前冇醫學證據顯示呢宗胎兒宮內死亡個案同豬流感疫苗有關。另外又話，根據世界衞生組織所講，並無研究顯示豬流感疫苗對孕婦或胎兒有不良影響。

衞生防護中心企圖利用世衞做擋箭牌，有冇用呢？計功夫茶話齋，世衞個朵本來幾響嘅，不過最近個招牌有少少生銹迹象，事關外國有專家質疑，所謂豬流感全球大爆發嘅講法可能係一場超級騙局。換言之，世衞有機會做咗懵到上心口嘅水魚！

冇耐前之嘛，有一位主管歐盟衞生事務嘅德國籍流行病學專家沃達格，懷疑所謂豬流感疫情其實係藥廠誇大其詞乘機牟利嘅「世紀醫學大醜聞」，歐盟更加通過議案，決定深入調查。沃達格仲批評，疫苗成效不佳，幾百萬原本健健康康嘅人毫無必要接種呢種測試不足嘅疫苗，一來浪費醫療資源，二來令到接種者陷於未知嘅後遺症危機。

係，冇錯，對於沃達格提出嘅陰謀論，世衞反應敏捷矢口否認。之不過咁，被騙嘅水魚通常冇咁快認低威嘅，就好似畀茅山師傅搵老襯嘅無知少女，一時三刻未必醒覺上床作法其實係呃神騙鬼；就算明知上當，都要等一段時間先至鼓得起勇氣報警。所以呢，對於世衞係咪無知少女嘅問題，都係暫時採取觀望態度好啲。

喂，疫苗本來係用嚟預防疾病嘅，點知隨時弄巧反拙捉晒蟲，冇病變有病，你話係咪激氣吖？特區政府醫療高官一味叫人打針打針打針，你話係咪靠害吖？

講番懷疑注射疫苗導致胎兒死亡呢一筆，功夫茶強烈呼籲，懷孕同胞注射不倫不類嘅疫苗之前最緊要搞清楚三條問題：醫生，唔打針得唔得？醫生，打針唔使死得唔得？醫生，打針萬一死咗搵你填命得唔得？