運輸及房屋局局長鄭汝樺（Eva）早排上立法會財委會傾高鐵撥款，馬拉松會議每次上陣都見副秘書長容偉雄傍到實，其實容偉雄有新去向，佢將於下月連升兩級出任旅遊事務專員，接替已經離職嘅方舜文（Margaret）。
政務官出身嘅方舜文舊年年尾離開政府，個位懸空大半個月，政府遲遲未公布接任嘅人選，原來係等容偉雄搞掂埋高鐵呢單嘢，否則Eva都未必肯放人。政府資深嘅政務官買少見少，不過公務員事務局局長俞宗怡都好有風度，大讚離職嘅Margaret表現卓越，成績係有目共睹。
四十八歲嘅容偉雄八三年加入政府做傳譯主任，八六年轉職政務官，佢喺○六年已升做首長級第四級（D4）副秘書長級職位，今次直情連跳兩級，出任D6級嘅旅遊事務專員。呢個位多年來都係女將出任，包括黎高穎怡、鄭汝樺同區璟智，個個後來都升職加薪，真係一個風水位，不過就唔知旺唔旺男丁嘞。