尋日立法會開大會，民協立法會議員馮檢基（KK）就邊開會邊拎住疊紙周圍騰，望真啲見佢係幫世界自然基金會拎份《為弱勢魚群發聲》嘅聲明，搵其他議員簽名。聲明大約係講番依家藍鰭吞拿魚正踏上絕種之路，希望簽聲明嘅人承諾以後唔再食藍鰭吞拿，同希望香港嘅食肆唔好再鼓吹市民食藍鰭吞拿魚，幫呢種弱勢魚類留番條活路。

原本以為簽聲明呢種表徵意義大於一切嘅事，好容易就搞得掂，點知KK牙痛咁聲，話搵咗成日都唔係好多人肯簽名，數吓手指，計埋得廿四個議員簽咗名，連一半立法會議員嘅數目都無，如果KK喺立法會提一個唔食藍鰭吞拿嘅動議，個動議都未必夠數通過。

陳克勤李慧琼「內訌」

KK解釋話成功率咁低，其中一個可能性係大家太忙見唔到面，不過自己都知好難逐個議員捉住嚟簽聲明，已經每個黨搵個代表幫手捉。唔知KK好彩定唔好彩，佢搵咗民建聯環境事務發言人陳克勤幫手，克勤仔拍心口話佢一個簽，黨員個個都會簽。但我哋撞到民記議員李慧琼（Starry）同陳鑑林，佢哋兩個都話無聽過呢回事，Starry仲話因為囡囡實在太鍾意食日本菜，所以驚簽咗囡囡會詐型，睇個勢唔簽嘅機率都好高咁話。

藍鰭吞拿刺身喺舌頭上溶化時慢慢滲出嘅獨有鮮味，當然好多人都唔捨得同佢講拜拜，要簽名承諾以後都唔食，真係一個好重大嘅決定。應承唔食某種食物，可能比作出一個政治承諾更難，因為好容易就會受唔住引誘。簽咗名嘅議員，唔知係咪真係已經諗清楚呢？