20/01/2010

播放本新聞相關短片

政情:食力簡傳胃癌得啖笑

一向牙擦過牙擦蘇嘅冠軍練馬師「食力簡」簡炳墀,經常叼住口大雪茄在馬場出現,一講起馬匹就龍精虎猛,但最近竟然被傳患上胃癌,講到真嘅一樣。我哋尋日問過幾位新界重量級鄉紳,但無人聽過呢個傳聞,好彩最後搵到簡Sir本人求證,佢中氣十足粉碎謠傳話:「嘥氣,無中生有,我老虎都打死幾隻呀!」

究竟邊個咁大整蠱連簡Sir都敢玩呢?簡Sir話呢啲謠傳嚟自網上,經常傳佢呢樣傳佢嗰樣,過去曾經傳佢「溝女」同「呃錢」,點知最近仲傳佢患上中期胃癌,佢好無奈話:「咁樣做人心哋唔好囉,我間中傷風咳就有,又無去睇過醫生,點解會傳到咁呢?」

簡Sir話,依家享受退休生活不知幾爽,揸住架「Rolls Royce(勞斯萊斯)」四圍去,除咗入馬場巡場外,一得閒就會約埋三五知己去打高爾夫球,上星期先分別喺粉嶺同清水灣高球會贏波,早前又與愛兒簡永輝到澳門遊玩,非常開心。