香港青聯副主席秦善文（Samuel）投資二千萬元嘅音響店Kharma尋日喺中環盈置大廈開張，成班青聯好兄弟都去恭賀佢，身為主人家嘅Samuel以粉紅色意大利牌子Dsquared2西裝褸襯牛仔褲迎賓，casual得嚟充滿喜慶色彩。Samuel話粉紅色sweet啲，感覺好開心！不過講耀眼就莫過於佢手上隻勞力士鑽石Daytona，價值三十一萬五千元，Samuel話隻錶係老婆送，戴住佢就好似老婆陪住佢咁。
Samuel同老婆感情好好，不過依家懷孕在身，為免老婆辛苦，Samuel寧願留老婆喺屋企同老友打牌，好過過嚟逼，認真細心！老婆無到，但青聯嘅陳仲尼、葉振都、洪為民等好兄弟就晨早嚟咗，不過佢哋三個都話唔識玩音響，要跟Samuel學吓嘢。向來鬼馬嘅Samuel就話音響同老婆一樣，個個男人都一定覺得自己老婆最好，但永遠鍾意聽人哋嗰套Hi-Fi，即係隔籬飯香嗰隻，但係每個音響發燒友都好鍾意挑戰人哋嗰套音響喎，所以佢已經預咗會有好多人嚟「踢館」，到時大家切磋吓！
卓妮