Peter極力推介四季酒店六樓嘅法國餐廳Caprice，間餐廳剛獲米芝蓮三星推介，近排好多老饕幫襯。Peter話佢最喜歡法式龍蝦雲吞，呢個係佢哋嘅招牌菜。此外，地道法國走地雞都令Peter讚不絕口。

Peter形容隻雞係「紅白藍雞」，即係紅色雞冠、白色皮，而對腳係藍色嘅。法國當地雞農好善待佢哋，畀每隻雞至少有一米嘅活動空間，所以雞隻數量會受到限制，咁啲雞隻咪有好大空間「散步」，所以肉質冇得頂！

如果天寒地凍，Peter就極力推介國金商場國金軒嘅蛇羹，佢話以前恒生銀行搞嘅蛇宴全城首屈一指，個廚師依家過檔李家旗下美麗華集團嘅國金軒，Peter梗要讚多兩句啦！

李家傑口中形容嘅「紅白藍雞」，其實就係法國走地雞。 （資料圖片）

Caprice剛獲米芝蓮三星推介，近排好多老饕幫襯。

卓妮