咦，咁似二○一二世界末日嘅？錯晒錯晒，功夫茶唔係好信末日論，地球即使真係要滅亡，點都要等到二○四七見證一國兩制五十年不變有冇兌現啩。

所謂大難臨頭各有各走，講嘅係最近出現嘅官場怪現象，一個二個高官冇鞋挽屐走，包括民政事務局常任秘書長尤曾家麗，今年六月先至到達五十五歲退休年齡，四月已經急急腳離開政府，未吹生日蠟燭就提早鬆人。除咗家麗姐姐之外，仲有幾個常秘排住隊走鬼，簡直就係高官逃亡潮。好明顯嘞，曾蔭權政府非常失敗，搞到個個意興闌珊無心戀戰，唔理三七二十一搵工跳槽。

喺咁嘅環境之下，你估會發生乜嘢事呢？答案就係超級筍工冇人做，焗住翻閹舊電池。好似平機會咁吖，醜聞不絕嘅主席鄧爾邦終於畀佢捱到一月十一日正式卸任，照道理，新主席人選應該一早公布啦，哈，荒謬嘅係唔止公眾唔知邊個接替鄧爾邦，連平機會上下人等亦都唔知何方神聖會係自己嘅龍頭大哥！

計功夫茶話齋，平機會主席一職雖然真係好鬼筍，月薪二十萬喎，係人都流口水啦，之不過咁，呢個三煞位好邪㗎，幾乎個個做主席都出事，真係冇乜邊個勇者無懼夠膽做。遠嘅唔講嘞，淨係睇番鄧爾邦，由於呢位哥仔管理混亂浪費公帑，審計署又猛烈批評，立法會又極度遺憾，唔使推出午門斬首已經偷笑，不必引咎辭職痛失約滿酬金已經執到。你話嘞，如果你係潔身自愛嘅正人君子，你會唔會心甘情願跳入臭罌做臭草？

既然冇人肯做平機會主席，隨之而來就係一個江湖傳聞，政府或者會翻閹退休高官，即係循環再用舊電池。

喂喂喂，咪住先，雖然話冇乜邊個傻仔願意做平機會主席啫，但係理論上係應該公開招聘噃，有乜可能任由長官意志翻閹舊電池先？

講到呢度，係時候重提舊事，記唔記得接替任志剛嘅新任金管局總裁係點樣遴選㗎？成個過程係咁嘅，所謂候選者完全唔知自己被列入遴選名單，由始至終淨係知道同曾蔭權老友鬼鬼嘅特首辦主任陳德霖一支公被遴選，結果又真係呢個大內總管陳公公自動當選。換言之，所謂公開招聘，純粹黑箱作業，來來去去用人唯親。

唉，其實呢，反正田雞過河各有各撐之下高官十分渴市，可用人才買少見少，而且平機會又撞板多過食飯，不妨咁諗，與其爭用舊電池，不如摺埋平機會。

平機會執笠大吉有兩大好處，一來唔好阻住舊電池去其他政府部門或者公營機構發揮殘餘力量，二來咯喎，等平機會裏面碩果僅存嘅少數人才蟬過別枝吖嘛！