新婚燕爾嘅中大校長、行政會議非官守成員劉遵義尋日春風滿面，到政府總部參與行政會議。雖然朝早嘅氣溫好低，但相信劉遵義已經暖在心。佢話暫時未有計劃去邊度度蜜月，但就暗示希望六月卸任中大校長前可以成行。睇嚟佢真係好心急陪太太喎！
尋日行政會議放完聖誕新年假後復會，一開就開足兩個半鐘，劉遵義開完會出嚟精神奕奕，相信同得到愛情滋潤有關。星期日舉行婚禮嘅新郎哥話，為免呢頭婚事驚動到大家，所以先至低調進行，兩口子暫時都未計劃好蜜月地點，一切仍然在研究當中。
劉遵義今年六月將卸任中大校長一職，距離依家仲有成五個月。被問及會唔會忙到卸任後先至有時間度蜜月，佢即刻笑笑口話「希望唔使啦！」言下之意即係唔想拖咁耐，最好盡快落實蜜月之旅，萬一冷落嬌妻就唔好啦！