坐落於沙田小瀝源嘅新界鄉議局綜合大樓，已經動工年幾，但都仲有四千萬元工程款項未有着落。上星期西貢北約鄉事委員會特登搞咗個籌款餐會，揼出席嘅鄉紳心口，成績都唔錯，有二百五十幾萬進帳。鄉議局主席劉皇發更加出錢出力，即時夾錢五萬元點名副主席張學明高歌一曲，現場氣氛high到爆！
嗰晚共擺咗五十二圍，淨係主家席都坐咗二十六人，每人捐兩萬元買枱，就已經進帳五十幾萬。熱心鄉紳又捐出大批禮物搞氣氛，有勞力士錶、Sony四十六吋高清電視機、旅遊現金券等，畀大家抽獎助興。
晚會另一個高潮迭起嘅籌款環節，係可以捐錢點唱。發叔講明自己唔唱，但就帶頭夾錢要張學明獻唱。張學明自言平時唔唱歌，上台時都有啲怕醜，但為咗善款惟有硬着頭皮上，唱咗十幾年前曾經傳唱一時嘅《新鴛鴦蝴蝶夢》。張學明左手揸咪、右手揸住一大疊金牛，好搞笑咁為錢賣唱，但又真有啲跟唔上節拍，台下眾人即刻打拍子助陣，終於喺大家同心協力下，完成咗「處女騷」。