高鐵撥款演變成政治事件，立法會被政治高氣壓籠罩，卿姐更加變成壓力煲，建制派採取明攻，揚言研究對佢提不信任動議，又話下年唔再選佢連任，而民主派則暗中施壓，要卿姐開路畀大家暢所欲言。卿姐年年爭做財委會主席，食得鹹魚抵得渴，今次遇上高鐵撥款攻防戰，身為球證嘅佢夾在窄縫，兩面受敵，相信係佢財委會主席生涯最難捱一役。

建制派嫌卿姐未死得，尋日踩多一腳，行會召集人梁振英、成員夏佳理同張炳良，一人一句唱雙簧，忽然間都不知幾有團隊精神，話相信財委會做事負責任，間接叫卿姐醒定啲，唔係就要承擔責任孭鑊。

主持重責「外判」秘書長

卿姐被兩邊陣營咬住唔放，如何解圍，成為高鐵撥款大戰嘅另一個攻防戰場，而拆解招數，係借立法會秘書處過橋，將主持會議嘅部分重責外判畀Pauline，好似決定開會以十粒鐘為限，而非政府原先嘅「最壞打算」廿八粒鐘，強調係根據秘書長嘅評估作決定，其他仲包括會唔會接納班八十後嘅要求，喺立法會裝直播電視屏幕同准許臨時借電，亦一律拋波由Pauline解答，咁就算議員或者示威者不滿，都真係干「卿」底事嘞。卿姐呢招金蟬脫殼，都幾高喎。不過聞說秘書處都有怨氣，擔心拉布議員未必肯合作，代價更加係破壞咗秘書處嘅中立地位添。

其實，卿姐借秘書處卸力，唔係第一次，上星期五財委會開到尾聲，建制派提出下次財會以「不設時限」形式審議高鐵撥款建議，卿姐就以「秘書有保留」為由否決，被建制派質疑搵秘書處過橋。其實，職員還職員，議員還議員，審議撥款始終係議員嘅責任，主持財委會嘅係財委會主席而不是立法會秘書長，最後有乜頭暈身慶，都應該由議員負責。