中大校長劉遵義宣布再做老襯，前日迎娶會計師麥嘉軒。劉校長結婚「先斬後奏」，前日帶太太出席中大球賽時口口聲聲話如果婚期定咗會公布，原來兩人就喺當日註冊，尋日發聲明感謝各界祝福。劉麥聯婚無公開擺酒，城中名人惟有發短訊道賀。
六十五歲嘅劉遵義同細佢十五年嘅麥嘉軒撻着，全城嘩然，原來劉校長呢次嚟真，前日唔聲唔聲抱得美人歸，註冊儀式冚得好密，相信只有雙方至親觀禮。
劉生劉太結婚當日無擺酒亦無度蜜月，攜手走去中大參加校長盃球賽，劉校長當日介紹Honey時仍以未婚妻相稱，認真鬼馬，嘉軒不但無詐型，樂於做跟得夫人黐實老公。嘉軒無名指上戴上閃令令鑽戒，幸福盡在不言中。
劉麥完婚，唔少老友紛紛發短訊恭賀，劉校長好客氣，叫大家唔使送禮，話過咗婚期就唔收禮，否則唔吉利喎。咁講，都係唔想朋友破費至真。