正所謂錢非萬能，但冇錢就萬萬不能，「紫金兵團」湖人截至尋日為止，以29勝8負高踞聯盟榜首，其實都係靠一張張嘅鈔票幫手！以今季嘅NBA薪酬上限計算，湖人就足足「超標」2,143萬美元（約1.6億港元），踢走紐約人成為○九至一○球季支付最多奢侈稅嘅球隊；今季共有十四支球隊「超標」，合共要為聯盟交出1.35億美元（約10.5億港元）罰稅，你話冇錢點掂！

NBA官方規定一眾球隊要於今月十日前，將隊中持冇保障合同嘅球員轉為有保障合同，亦代表三十支球隊嘅○九至一○球季工資總額將會大定。按照NBA今季所列出嘅5,770萬美元（約4.4億港元）薪酬上限，目前有多達十四支球隊嚴重超標，其中湖人就成為今年「交稅王」，要上繳多達2,143萬美元奢侈稅（Luxury Tax）畀NBA賽會。

紐約人減磅跌出三甲

事實上湖人粒粒皆星，薪酬自然易「爆煲」，當家球星高比拜仁成為今季NBA打工皇帝，坐擁2,300萬美元（約1.78億港元）年薪，此外加素及拜林合共接近收3,000萬美元，所以三人嘅薪酬已超過5,000萬美元之多！再者球隊仲有奧當及阿堤斯等中價球員，最弊連胡查錫及禾頓等後備都有約500萬美元年薪，湖人點可能唔「超標」呢！

至於分列第二、三位嘅亦屬強隊，就係今季脫胎換骨嘅小牛及「綠衫軍」塞爾特人，前者班主古班向來出手闊綽，近年都唔多介意被罰稅；塞爾特人情況與湖人相似，都係太多星級球員在陣，「三巨頭」中最低薪嘅加納特都獲超過1,600萬美元（約1.24億港元）年薪，同樣亦「爆煲」，而上季「交稅王」紐約人積極「瘦身」後，終跌落第四位。

主力停賽巫師獲退稅

不過，球隊都有方法獲得「退稅」嘅，只要有球員被禁賽，就可以獲逐場計算方法退款。好似巫師嘅亞連拿斯被禁賽後，球隊可以獲得每場74,000美元退稅，若然佢今季一直被禁出場，預計巫師就會獲得370萬美元，總算冇咁傷。