自從煲呔曾擴大問責制、以天價人工委任副局長同政治助理後，公務員已經有不少微言。加上煲呔曾頻頻施政失誤，令高官壓力愈來愈大，唔少人已意興闌珊，真係走得快、好世界。最新佐證就係現年五十四歲嘅肥尤，佢下個月會調去公務員事務局，出任政務主任招聘委員會主席，然後做到四月就退休。其實肥尤可以做到六十歲至退休，但佢寧願選擇早走早着，可見佢去意已決。

意興闌珊 出現斷層

唔單止肥尤係咁，好似今年十月先滿五十七歲嘅食物及衞生局常秘孔郭惠清，同肥尤一樣提早求去。聞說孔太有感仔女已經長大成人，所以一早申請今年上半年閃人，打算早日離開政府，過番啲優哉游哉嘅退休生活。

除咗肥尤同孔太，同樣今年離開政府嘅，仲有運輸及房屋局常秘陳鎮源，同埋商務及經濟發展局常秘蔡瑩璧，兩人分別喺今年三月同年底屆滿六十歲退休年齡，所以都係要起身鬆人。一年內有四位常秘離開，官場流傳嘅大熱接任人有三名女將，就係勞工處處長謝凌潔貞、特首辦常秘謝曼怡、電訊管理局總監黎陳芷娟，以及一名男高官，佢就係海關關長袁銘輝啦，睇嚟今年政府嘅音樂椅將響個不停！

講番接替肥尤嘅楊立門，佢做過發展局常秘。官場流傳，楊立門因為與發展局局長林鄭月娥不和，毅然走去進修。今次調過去跟民政事務局局長曾德成，是好是壞仍然係未知數，事關德成局長上任以嚟，除爆咗單「河蟹事件」外，稍微有建樹嘅只有東亞運，但一樣鬧出唔少問題，睇嚟楊立門都係自求多福啦！