本港出現首宗懷疑注射豬流感疫苗導致吉巴氏綜合症個案，搞到人心惶惶，如果一班高官早知咁大劑，相信唔會斷然話無副作用，亦唔會咁英勇帶頭去打豬流感針做騷。不過，任職護士嘅衞生服務界立法會議員李國麟就好勇猛，計劃喺周三前往葵涌瑪嘉烈醫院打豬流感針，仲聲言其護士太太都決定咗去打。
李國麟話，大家都知道打豬流感針有副作用嘅風險，唔單止市民難以作決定，連醫護人員都係一半人肯打，但佢覺得自己經常接觸病人，無理由唔打，衡量風險後，認為打針始終都係好啲，而麟嫂就夫唱婦隨決定打針。至於屬高危一族嘅父母，李國麟就話交由兩老自行決定喎。
早前一班高官及醫生帶頭打豬流感針做騷，原來李國麟都有報名，但因為當日遇上有學生大學畢業，所以無去打針。不過，據聞有份打針嘅醫管局主席胡定旭，事後鬼打都無咁精神，未見有副作用，打針翌日仲同同事一齊離港公幹，睇嚟政府要搞清楚豬流感針嘅副作用，先可以挽回市民信心。