中環出更：王賢誌塞車錯過拉頭馬

Vinci愛駒「大將風騷」出戰第一場，隻馬賽前狀態一般，Vinci都唔敢寄以厚望，但佢一起身就由九龍屋企飛車去跑馬地，仲叫司機行西隧，避開紅隧，點知依然塞到爆。開跑一刻，佢扭開收音機聽賽馬直播，暗暗打氣。

「大將風騷」最後以黑馬姿態奪冠，帶挈主人袋超過廿八萬元獎金。Vinci事後趕抵馬場，表現興奮，佢話，隻馬跑第二、三名已收貨，可惜自己拉唔到頭馬，有啲失望。

贏頭馬嘅，仲有仁濟主席李文斌一家，哥哥李文俊愛駒「包裝選擇」出戰第八場，文俊出差，唔喺香港，爸爸李運強就出動囝囝文恩及文斌（Edmond）喺看台打氣。「包裝選擇」一度排第三位，但後勁凌厲，臨衝線前二百米狂奔終點，捧走「香港交易所盃」，贏得近八十萬元獎金，Edmond興奮地攬住太太Amanda歡呼。

李文斌（前排左四）從港交所主席夏佳理嘅太太夏安麗（前排左五）手上接過獎盃，後排嘅馬會大董都戥佢高興，右三為夏佳理。（何偉鴻攝）

陳永棋話，「精密紡」唔擅長跑濕地，跑第二情有可原。

陳永棋跑第二「賴」落雨

同場仲有全國政協常委陳永棋，棋哥隻「精密紡」以神勇姿態出戰第六場，可惜最後跑第二。棋哥賽後話，係落雨影響，否則一定拉頭馬。不過，跑第二名都有逾十四萬元獎金。復活節就到，棋哥將同家人遊新加坡，賀老友間烹飪學校開幕，順便遊埋泰國喎。