本文重點
凍咗幾日，太陽伯伯尋日終於蒲頭，難得咁好天氣，蘇澤光（Jack So）尋日朝早約埋卓妮同班朋友一齊遊山玩水，咪睇Jack So坐開冷氣房，其實好愛親親大自然，我哋先喺西貢匡湖居坐船出發到三星灣上岸，再行四十五分鐘到白沙灣，然後坐返船去西貢碼頭食飯，玩足半日。自嘲五十後嘅Jack So，體能極好，前晚先喺上海睇完世博場地返港，尋日上山落斜行足四十五分鐘都唔喘氣，好彩卓妮平時做開運動，否則好失禮。
場地細阻發展
Jack So以前自己有遊艇，得閒會出海吹吓風relax吓，不過早兩年佢賣咗艘遊艇，專心打高球。係咪真㗎？一半一半啦，其實佢要更專心打佢嗰幾份無良工就真。Sorry，一時手快打錯，係無「糧」工先啱。Jack So依家係貿發局（ＴＤＣ）主席，又係電影發展局主席，兩份都係義工，但佢做得好投入。
咁又係，ＴＤＣ嘅展覽做到有聲有色，為香港帶嚟好多商機，喺電影發展局又可以幫香港電影打入內地巿場，難怪咁有滿足感。雖然佢貿發局主席新兩年嘅任期剛開始三個月，Jack So都係有交帶之人，唔想交齊功課就算，希望落實會展第三期嘅興建，始終場地有限會窒礙香港展覽業發展；佢話周邊城巿郁下都話有幾百萬呎地方使，會展依家雖然完成中庭擴建，但長遠都係唔夠，加上時裝展、電子展呢啲展覽已打出名堂，佢更加唔忍心因為地方唔夠用輸畀人。政府收到喇！
卓妮