舉個具體例子，如果港府將注射豬流感疫苗嘅風險向市民詳細交代，做多啲宣傳，而唔係扮神秘懶「專業」，注射計劃就唔會搞到唔湯唔水，市民唔打又驚，打咗仲驚。

嗱嗱嗱，本港啱啱出現首宗懷疑注射豬流感疫苗引發吉巴氏綜合症個案，當局仲實牙實齒話唔會叫停打針計劃，尋日又有多名市民注射豬流感疫苗後感到不適，其中一名曾患紅斑狼瘡症嘅女子送院搶救後情況危殆。

真係啱啱遇着剛剛，台灣又傳出一位上月中接種過豬流感疫苗嘅男子，前幾日喺屋企猝死，死者生前身體一直唔錯，懷疑死因同疫苗有關。連續爆出涉及疫苗嘅負面新聞，市民唔擔心就假。

不過，食物及衞生局副局長梁卓偉依然好「淡定」，話預期陸續會有接種疫苗後不適嘅市民求診，當局會為病人檢查，確定係咪同疫苗有關。既然咁「先知先覺」，不如預測埋會有幾多人中招吖，笨！

衞生署衞生防護中心總監曾浩輝講得更抽象，話經過評估，注射疫苗「好處大於風險」，連世界衞生組織都話，豬流感疫苗唔會導致吉巴氏綜合症個案上升喎。咦，即管聽吓人哋點講。世衞西太平洋地區負責人話，收到港府通報首宗接種豬流感疫苗後出現吉巴氏綜合症嘅報告，目前未能證實兩者係咪有關連，要再詳細研究。

嗱，唔該搞清楚，世衞話「未能證實」疫苗會引發吉巴氏綜合症咋，並冇排除有呢種可能性㗎。當局未搞清楚首宗懷疑注射疫苗導致吉巴氏綜合症原因之前，咁快就作出有關個案唔會上升嘅結論，令資訊亂上加亂，結果只會弄巧反拙，搞到人心惶惶，市民更加無所適從。

事實勝於雄辯，港府訂購咗三百萬劑疫苗，截至尋日得十一萬多人接種，遠低於預期。連曾浩輝都承認，有心理準備疫苗可能會有剩，似乎已打定輸數。正所謂，有備無患，儲備足夠疫苗應對不時之需一啲都冇錯，問題係，當局淨係顧住做「打針騷」，買咗疫苗返嚟就大安旨意，低估市民對注射風險嘅憂慮程度，相關資訊披露透明度嚴重不足，仲要市民接種前簽後果自負嘅「生死狀」，唔縮沙至奇啦。

再講，首宗懷疑注射豬流感疫苗引發吉巴氏綜合症嘅病人本月二日入院，當局四天後至對外公布，連負責打針嘅私家醫生都唔知情，當局有刻意隱瞞之嫌。萬一今次真係因注射疫苗引起，後果不堪設想，呢啲咪係風險囉。

計功夫茶話齋，與其出事至搵個高官出嚟做「棟篤騷」，不如盡快公布檢測結果，澄清疑惑，話畀市民知，究竟注射豬流感疫苗會有乜嘢副作用，邊類人士唔適宜注射，等市民心中有數。如果唔係，買疫苗筆公帑隨時揼晒落鹹水海㗎咋。