本文重點
立法會議員霍震霆三公子霍啟人目前喺英國溫徹斯特學院（Winchester College）主修經濟學，每逢節日放假都會返港抖吓，之前聖誕節及新年假都唔例外，但時間過得好快，啟人尋晚已乘夜機返回英國，小霍下午特別抽時間同啟人食飯餞行，兩仔爺仲喺中環置地廣場行咗一陣，直到下午四時小霍夠鐘返立法會開會才告別。
置地行街食飯
立法會財務委員會尋日下午四時開馬拉松會議，審議廣深港高鐵工程撥款，卓妮三時四十五分就喺置地廣場間Ralph Lauren男裝部見到小霍同啟人兩仔爺睇衫，戴住太陽眼鏡嘅小霍穿着筆挺西裝，一身Causal look嘅啟人就戴住頂黑色Cap帽，遮擋住半張臉，好難被認出。兩人睇咗一陣衫，無賣任何嘢就離開，然後正式道別。
小霍話尋日工作好忙，希望喺啟人返英國前食餐飯聚吓，食到四點鐘就要趕返立法會開會。至於係咪廿四孝陪囝囝去買衫返英國，小霍就話買衫嘅嘢，啟人自己會搞掂喎。咁又係嘅，小霍畀張附屬卡啟人就乜都搞掂晒啦！講番前日社民連黃毓民同詹培忠喺議員堂上爆粗鬧交，小霍就話議員要用議員應有嘅態度去講嘢喎！
卓妮