呢兩日氣溫急降，沖番杯熱茶呷兩啖，就夠晒溫暖。先排工展會，中華廠商聯合會永遠名譽會長楊孫西都開咗兩個茶葉檔賣茶葉，當中最貴嘅係名茶野生大紅袍，兩両賣四千八百蚊，聽聞話銷情麻麻，不過講到做生意，楊生係老行尊，又點會開個檔嚟蝕呢？楊生話大紅袍係比較貴，但佢哋嘅貨豐儉由人，其他茶葉賣得好好，整體營業額仲高過上年一倍添！
天氣雖然凍，楊生就話冇有怕，皆因佢經常要京港兩邊飛，仲話香港點都凍唔過北京。
見楊生講生意經定過抬油，原來佢做司儀仲老定，尋日佢出席一個座談會幫手做主持，席間以普通話作主要語言，本身係福建人嘅楊生一口字正腔圓普通話，佢仲講得好流暢，連「貓紙」都唔使點睇。
不過，楊生謙稱自己講得認真麻麻，加上有人幫佢事前寫好講辭，所以唔係好難，事前亦唔需要特別背稿，睇嚟下次再有活動搞，可以繼續搵楊生做金牌司儀喎。