ＣＹ批評港府唔係第一次，不過，今次搞到喺外國網上刊物力數港府不是，ＣＹ係行會召集人，身份特殊，事件夠晒震撼。ＣＹ批評港府，制訂政策一直缺乏長遠規劃，叫煲呔曾應該要有視野，直接同市民接觸，又話香港貧富懸殊嚴重，如果樓價高企問題唔解決，市民就會怨氣累積。總之，ＣＹ筆下嘅煲呔曾同港府，一無是處，唔知仲以為呢篇喺反對黨派嘅會刊。

ＣＹ身處建制，但係一向手指拗出唔拗入，批評政府有時比港府口中嘅反對派更加鍥而不捨，佢早喺○八年初，已經搶閘宣告煲呔曾嘅工資保障運動失敗，表態支持最低工資立法，對行會支持訂下嘅工作時表視若無睹，其後又多番批評香港嘅貧富懸殊問題嚴重，諗唔到佢愈嚟愈明目張膽，而另一行會成員鄭耀棠亦同ＣＹ坐埋一條船，齊齊作反。

棠哥助拳 唐唐「唸書」

棠哥對ＣＹ指港府施政乏遠見嘅批評表認同，好似廣深港高速鐵路諮詢做得唔好，與內地合作又歎慢板，棠哥講到理直氣壯，簡直當煲呔曾無到。

港府被視為自己友嘅行會成員如斯狠批，政務司司長唐英年尋日笑笑口唸書，話港府會本着以民為本理念施政，構建和諧社會，而整個特區管治團隊亦都本着呢個原則做事。

學者宋立功就指，ＣＹ嘅舉措會喺一定程度上打擊政府威信，相關政策局局長嘅心情一定唔好受。其實，最唔好受嗰個肯定係煲呔曾，咁樣被自己嘅閣員狠插，眾叛親離，點會唔心酸。不過，煲呔曾唔好怪人，要怪就怪自己施政失效、管治無方；如果你做得好，就算ＣＹ同棠哥作反，都搵唔到位入啦。