William梁去年十一月卸下擔任咗八年的香港舞蹈團董事局主席身份後，今年起「升呢」做演藝校董會阿頭，官仔骨骨嘅佢鍾情表演藝術，對衣着更講究。

前日佢以浸大校董會司庫身份出席該校電影學院成立禮，戴上別致銀色Collar Pin。佢話依家好少人戴Collar Pin，想買就要去舊式洋服店至得，每支Pin售價只係四至五百蚊，好抵用。

William戴Collar Pin有苦衷，佢話天生頸長，訂造恤衫時衣領特別高，令領呔容易下滑，所以由廿幾年前起戴Collar Pin頂住條領呔，家中至今珍藏了四、五支Pin。講到戴手錶，佢鍾情一款由太陽能推動嘅星辰錶，貪佢唔使上鏈，夠方便。