不過對於的士司機嚟講就悲哀咯，開唔到工固然損失慘重，更加令人擔心嘅係，萬一喺高速公路失驚無神跪低，隨時發生後果嚴重嘅車禍。功夫茶有一個親身體驗，有一次喺屯門公路揸揸下車突然死火，真係嚇破膽㗎，好彩當時仲有啲啲咁多多剩餘動力，足夠慢慢溜去路肩，咁先至叫做有驚無險咋。

咦咦咦，咪住先，唔止的士有事喎，家陣連小巴都話頻頻死火，數量涉及二百架。

據業界估計，總數一萬八千幾架的士之中，大概有三分一受到死火問題困擾。嘩，老友，三分一即係六千架的士咁多，梗有一架喺左近，容乜易車毀人亡㗎！呢鋪確係名副其實死晒火，全城死火嗰種死火！

司機大佬話喎，懷疑係入咗有問題嘅石油氣出事，而最大嫌疑係中石化，因為大部分受影響的士都幫襯過呢間公司，有人呢頭入完氣，轉頭即死火。可惜吖，中石化始終否認產品有問題，而負責監管嘅機電署更加離譜到冇朋友，署方話喎，一直冇機制抽查車用石油氣，淨係靠入口證明書。

唉，機電署都唔化嘅，就好似內地三鹿牌毒奶粉咁吖，唔通奶粉包裝紙上面會清楚寫明「內含致命三聚氰胺」呀？你唔打開驗一驗，鬼知奶粉有冇毒咩！

一聽到機電署咁荒謬嘅講法，的士司機大佬當堂激到扯火，業界決定將抗議升級，今日發動大概三十架的士慢駛遊行。之不過咁，唔好怪功夫茶杞人憂天，聽講的士平時一減速就死火，利用慢駛遊行表達不滿，會唔會捉蟲㗎？諗諗下其實又冇所謂喎，慢駛遊行期間死火仲好，等全世界親眼見證問題所在吖嘛。

計功夫茶話齋，最冇品嘅都係機電署，的士集體死火現象早於去年九月已經有人向署方反映，搞來搞去搞咗幾個月，哈，機電署始終乜都冇做過喎，完全冇抽驗石油氣。喂，打個譬喻吖，有人投訴幫襯過某間茶餐廳之後屙到七彩，懷疑食物中毒，你做官嘅，梗係要直接攞相關食物去化驗㗎啦，唔通打電話去食物原產地，例如福建省某某縣某某鄉，要求人哋送一張入口證明書畀你過目咩！

點都好啦，當功夫茶買你怕，懇請機電署唔好再做監管失敗又懶到出汁嘅超級庸官，做做好心查明真相。真係好鬼死牙煙㗎，唔知幾多千架的士，唔知幾多百架小巴，頻頻死火，處處跪低，等於一個又一個炸彈通街走。一旦死火引致人命傷亡，功夫茶拍心口同機電署保證，到時全城扯火，庸官更加死火！