立法會議員梁劉柔芬（Sophie）月中飲完新抱茶後，工作依然忙個不停，上星期六喺東亞運動會香港足球隊祝捷酒會出現後，尋日又見佢同經濟動力三位成員到政府總部見財爺，之後又急急腳鬆人，趕去參加志蓮淨苑水陸法會。忙咗咁耐，Sophie終於可以鬆番吓，今日同家人起程到新加坡旅遊過新年，仲話會大歎當地肉骨茶添。
Sophie話，其實唔單止佢工作忙，佢身兼香港足球總會主席嘅丈夫梁孔德一樣咁忙，為籌備港足參加東亞運奔波咁耐，好應該去旅行休息吓。至於會遊覽獅城乜嘢旅遊景點，Sophie就話三個仔女已經安排好行程，佢只係跟大隊去玩喎！咪睇暢遊獅城無乜特別，對Sophie嚟講意義重大，事關新抱阿May入門後第一次同佢去旅行，旅行有新抱照顧，去都去得甜啲啦！