身為中華廠商聯合會嘅立法會代表，大輝三句不離本行，落足嘴頭推銷工展會，今日仲親自聯同立法會四散人去捧場，佢話最低消費就談唔上喇，不過唔好好似煲呔曾咁就得。梗係啦，今年煲呔曾勁縮皮，買千幾蚊嘢就算，買完嘢仲懶得戚話今年唔使刺激經濟，比舊年同特首辦夾份買過萬蚊差好遠。大輝直頭講明，個個好似煲呔曾咁消費唔掂㗎啦，認真一語中的，咁四散人識做啦！

呻委任議員無投票權

前菜之後，大輝食住主菜談最熱嘅政改。佢直言今次政改方案「生不逢時」，一來社會怨氣大，二來方案本身有先天缺陷，不過最關鍵可能係煲呔曾一句「玩鋪勁」。大輝話政改係嚴肅嘅事，豈能用「玩」嚟形容？再者個「勁」字畀咗社會好大期望，所謂希望愈大、失望愈大，政府嘅區議會方案，令委任區議員喺立法會選舉中失去被選權與投票權，單係呢點已經足夠身為沙田區委任議員嘅大輝呻咗半餐飯，仲揚言如果委任區議員無投票權，下次再委任佢都唔制嘞。

不滿對運動員大細超

講完一輪正經事，食甜品嘅時候傾到大輝至愛嘅足球，點知大輝一樣有話要講。今次香港喺東亞運取得佳績，焦點落咗喺港足歷史性奪金。大輝覺得一切榮譽、掌聲同歡呼都唔應該只落喺一場球賽之上，因為咁樣係對其他運動員唔公道。但最刺激到大輝嘅始終係煲呔曾，眼見煲呔曾前日見國家主席胡錦濤時，只係講起港足奪金一事，大輝七情上面促請煲呔曾唔好忽視其他運動員，反問難道乒乓孖寶同打羽毛球嘅葉姵延無努力過咩？

由前菜到甜品、工展會到東亞運，大輝都寸盡煲呔曾。政改出爐，佢質疑煲呔曾有否違反競選承諾，大輝已經畀人話佢曲線幫前僱主、政務司司長唐英年，今次再度唔客氣，唔通佢決意擺明車馬話畀大家聽：事實確是如此？