廣告界才女、新世界中國實業董事總經理紀文鳳，不但工作上忠於大老闆新世界集團，原來連個胃都忠心不二。卓妮早前喺酒會度見到佢，佢話君悅酒店中菜廳「港灣壹號」係佢嘅飯堂，由酒店開幕幫襯到依家，廿幾年來不離不棄添！
佢話最鍾意間餐廳嘅老火湯，問佢鍾意邊款，佢不假思索咁話：「款款都鍾意！」紀文鳳話，當年君悅開幕時，佢仲喺廣告公司做嘢，公司就喺君悅附近，佢成日行過嚟開飯。
講起君悅，紀文鳳愈講愈興起，原來佢係君悅嘅忠實擁躉，除咗「港灣壹號」之外，酒店入邊嘅日本餐廳鹿悅（Kaetsu）、意大利餐廳Grissini都係佢嘅最愛。
「港灣壹號」係好多名人嘅飯堂，佢嘅特色係擁有無敵海景，同埋室內設計糅合咗三十年代大班位於山頂嘅豪華府邸，但係提供嘅卻係好地道嘅家鄉菜。主廚添哥話畀我哋聽，佢哋嘅蟹王四川蝦球好受歡迎，仲有好多得獎名饌添！