本文重點
華懋集團總部尋日正式落戶荃灣如心廣場，華懋新掌舵人龔仁心率領一眾高層及職員，早上九時在如心廣場三十七樓舉行切燒豬開幕儀式，為集團業務揭開新一頁。龔仁心好講意頭，除叮囑員工要食過拜神燒肉外，仲向每名員工派發一封大利是、金桔及金莎朱古力，祝大家工作順利，並寄望集團搬新屋後有一番新景象，再創佳績。
大派利是金桔
華懋搬新屋後，地方明顯闊落過以前尖東個辦公室，但相信最重要係忘記過去尖東華懋留下嘅不快事，重新上路。龔仁心與一班華懋老臣子及員工都為集團喬遷感到高興，他與大家打成一片，仲猛叫員工：「食多啲啦！燒肉靚呀！」開幕儀式過後，龔仁心拜託家姐龔如心生前秘書區燕玲向大家派發大利是、金桔、花生及朱古力予各部門員工。
卓妮問到搬遷集團有何展望，龔仁心話：「搬新Office後希望有一番新景象，再創佳績，但點講都無用，你哋留心睇吓成績點啦！」其實尖東華懋總部辦公室早在聖誕節前已開始將文件封箱及打包，而區燕玲與多名同事則先到新總部打點，直至本周一才正式運送到如心廣場。龔仁心尋日講到搬屋時話：「我都無乜特別嘢搬，都係搬啲私人嘢啫！」
玄學家麥玲玲話，尋日係「成日」，即係好日子，早上七時至十一時更加係好時辰，宜喬遷或開市。不過，對於有否擇過良辰吉日辦喬遷之喜，龔仁心話：「唔知喎，尋日（廿八日）搬過來，咪今日（廿九）搞入伙儀式囉！」
卓妮