香港足球喺東亞運一洗頹氣，事前被一致睇死之下，出乎意料之外愈戰愈勇，最終喺決賽擊敗日本歷史性勇奪冠軍。你知啦，本地球壇長期陷於一潭死水嘅沉悶局面，甲組有幾多支球隊，球隊大寶號係乜東東，球員係阿貓定係阿狗，恐怕冇乜邊個噏得出。忽然之間，七百萬熱血同胞一夜覺醒，原來香港足球未死㗎！原來香港仲有球星㗎！原來陳七去英超試腳㗎！

因為港足創造傳奇踢出爭氣波，令人諗起失落咗幾乎半世紀嘅「亞洲足球王國」美譽，於是乎，球迷愈諗愈氣頂，點解香港政府一直漠視足球運動？點解球員吐氣揚眉之後，政府官員居然唔怕醜跳出嚟攞威？所以，球迷發起一二二七遊行，高呼「振興足球、港府有責」口號，促請政府增撥資源，同時要求足總加強本地賽事宣傳。

如果你問起政府對於本地足球有幾多支持，答案相信會笑到你碌地，政府每年撥款七百萬！

喂，知唔知人哋外國一個球星嘅周薪係幾多？隨時百幾二百萬港元。區區撥款七百萬咁大把，唔夠養外國半支球隊一星期，竟然用嚟養晒幾百個本地球員同埋教練一年咁多，平均每人每月一千蚊左右，慘過赤貧蟻民領綜援。

由於缺乏支持，港足愈踢愈差，咁就造成惡性循環嘞。政府話喎，你踢得差吖嘛，所以足球唔再係重點培訓嘅精英體育項目，即係話，唔止冇財政支持，連球場都冇得你用。

所以話啫，香港足球隊今次贏到東亞運冠軍，的確係喜出望外嘅奇迹，邊個諗到慘遭遺棄嘅孤兒仔會有出人頭地嘅一日？大家睇睇日本吖，近年足球發展蓬勃到極，背後就係靠政府大力支持。香港咯喎，支持就冇，抽水就有，難得曾蔭權仲好意思話十二月十二日係佢全年最開心嘅一日。打個譬喻吖，阿爸由細到大唔理阿仔，又冇供書教學，又冇畀錢開飯，當阿仔奮發圖強成為會考狀元，阿爸就沾沾自喜通街認叻，呢個咪係令我開心到飛起嘅乖乖仔囉，全部係我遺傳㗎！

講番尋日嘅球迷遊行吖，主要嘅訴求除咗係政府增撥資源之外，另一矛頭係直指足總。示威者認為，足總存在長期嘅管治問題，要求加強透明度，監察球會運作，改善賽期安排，增加港隊國際友誼賽以及對足球賽事嘅推廣。

大家知唔知足總對於賽期安排有幾混帳？今屆省港盃喺十二月二十九日以及一月二日比賽，足總居然安排南華同飛馬喺一月三日聯賽對壘，另外又臨時編排大埔對大中同一日開波，搞到四隊港腳無緣衞冕省港盃。

即係咁，港足傳奇靠自己，港府支持嘥鬼氣，計功夫茶話齋，曾蔭權一係下令全力開水喉，如果唔係，下次香港足球創造傳奇一刻，唔該唔好再跳出嚟獻世，畀球迷柴台柴到臉黃就唔好啦！