政情：學生逞勇 泛民埋單
香港大學副校長任命風波愈演愈烈，上周二學生因為不滿校務委員維持「等埋首副」決定，強闖會場，圍堵禁錮校委，令校委之一盧寵茂於事件中受傷，引起社會關注。其實，港大事件正正係大半年前發生嘅佔領運動續集，學生硬要勇武抗爭，令泛民迫於無奈同佢哋癲埋一份，最後行動過激令社會反感，行動過後學生可以全身而退，不過被拉落水嘅泛民就要付出政治代價，更加要面臨票債票償，真係畀學生玩殘！
圖休兵淡化政改
七十九日嘅佔領行動，好大部分時間由學生主導，由闖入公民廣場至衝擊立法會，學生都未有同泛民做協調，泛民好明顯係被學生「夾上轎」。為咗淡化政改同佔領為泛民帶嚟嘅負面影響，泛民政黨都同意暫時休兵，先搞好經濟同民生。點知港大出現委任副校事件，部分泛民按捺不住出動「抽水」，勢估唔到又演變成為佔領續集。
當晚唔同政黨同校友，只係留喺港大鈕魯詩樓門口，同喺十樓衝入會議室嘅學生完全無關，至於樓下圍堵校委嘅人，正如袁國勇話，大部分「粗口爛舌」，都幾難想像同政黨人士有關。再睇番當日出席集會嘅泛民，面對圍堵事件未及反應，只係冷眼旁觀，泛民今次真係做又錯、唔做都錯喇！
葉余梁「冷血」旁觀
當日有份去抽水嘅有教育界立法會議員葉建源，公民黨梁家傑、余若薇亦全程在場，仲被發現袖手旁觀校委被學生包圍事件，無端端多咗一宗冷血嘅罪名。至於民主黨就完全無影，該黨代表單仲偕都只係出現咗一陣就閃人，算係執身彩。公民黨今次副校事件唔止抽唔到水，仲要背負罵名，真係「偷雞唔到蝕揸米」喇！