立法會議員梁劉柔芬（Sophie）細仔梁麒繕上星期大婚，三個仔女已經全部成家立室，Sophie成個人鬆晒，話可以放下心頭大石。前幾日喺東亞運動會香港足球隊祝捷酒會度，見到Sophie嚟捧老公足總主席梁孔德場，Sophie講到仔女離巢後嘅心情，開心到眉飛色舞。
Sophie話，飲咗杯新抱茶之後，到依家都甜在心頭；一對新人擺完酒之後去咗澳洲度蜜月，囝囝仲Send咗個「I Love You, Mum」嘅短訊畀佢，睇到Sophie甜到漏！
講起仔女經，Sophie就講到停唔到口。佢話囡囡依家幫人尋找投資項目，佢又畀我哋睇手機內一張地盤相，原來係阿女喺上海幫人投資起醫院。Sophie屋企都好有米，問佢有無投資埋一份，佢承認都有少少投資嘅。
問Sophie今年聖誕點樣過，佢同好多名人都一樣，話唔會出埠，原來志蓮淨苑呢幾日舉行一連幾日嘅盛大水陸法會，Sophie話晒係志蓮淨苑嘅開國功臣，當然要留港幫手啦！