建制派九西港島任人玩

去年立法會選舉，泛民喺九西嘅得票高達六成四，仲高過傳統票倉港島區，而港島區一向係泛民天下，兩次補選建制派都無法打破選票六四比嘅黃金定律，據了解，建制派打過算盤，認定喺呢兩區贏面相當低，亦正正打定輸數無所求，所以，建制派認為喺呢兩區參選毋須協調，可以百花齊放，一嚟畀機會其他政黨政團練兵，二嚟可以淡化兩邊陣營對決嘅味道，沖散「五區總辭、變相公投」議題，而呢個咁神聖嘅任務，就落喺金勞詹同白姐姐身上嘞。

出名「語不驚人誓不休」嘅白姐姐，日前已再三表明，一定會出選九西，狙擊黃毓民，佢仲連競選口號都已經諗埋，就係「Say No To毓民！」白姐姐批評毓民喺議會內爆粗掟蕉，教壞細路，仲話旺角鬧市空降鏹水彈嘅變態狂徒，分分鐘多少係受到佢嘅偏激言行影響。

白姐姐仲話，自己一向好支持民主，不滿政府提出嘅政改方案，泛民最緊要守住立法會政改否決權，唔係郁啲就賭鋪勁玩辭職，輸光輸淨之後又再向選民借過，欺騙公眾兼浪費公帑。白姐姐講嘢咁精警，唔怪得咁有信心可以同毓民爭一日長短，到時淨係爭辯社民連掟蕉爆粗嘅道德問題，都肯定火花四濺，仲邊有人理會五區總辭係咪等如變相公投呢啲大道理吖？

港島區嘅選情隨時仲亂過九西。「潮州怒漢」詹培忠同我哋話，如果泛民辭職，立法會又撥款進行補選，佢一定會信守承諾，跟隨泛民成為第六個請辭議員，並落場參與五區補選，至今首選仍然揀落戶港島。金勞詹言論一向出位，如珠炮發，若然真係參選攪局，狙擊公民黨陳淑莊，肯定有好戲睇，娛樂性夠晒豐富，市民當睇棟篤笑，輕鬆有餘，緊張不足，泛民同建制派對決嘅味道自然降低，泛民「變相公投」嘅招數亦變得無處着力，不攻自破！大家不妨拭目以待吧。