前幾日我哋提過有六個問責司局長趁聖誕放假叉電，雖然有啲已經銷假返工，但政務司司長唐英年、民政事務局局長曾德成、食物及衞生局局長周一嶽同保安局局長李少光，仍然歎緊世界未返工。本來大家以為呢批局長放完假之後，特區政府應該維持正常運作，點知一睇尋日出版嘅憲報，先知港府依然停留喺半真空狀態，事關又多四個局長申請放假。
接力放假嘅局長包括環境局局長邱騰華，佢由本月廿七日一路放到落下個月六日，一口氣放十日假，睇嚟可以趁機一吐畀慳電膽風波困擾嘅烏氣，順便檢討吓。
財經事務及庫務局局長陳家強、商務及經濟發展局局長劉吳惠蘭（Rita），同埋喺政改諮詢孭重飛嘅政制及內地事務局局長林瑞麟都放假去歎世界，Rita上次已經放咗兩日假，今次又再放八日，聖誕新年假期密密放，認真滋陰。數吓手指，成個聖誕新年假期間，三司十二局保持住四至六個司局長攞咗假，大家睇嚟真係要趁聖誕節祈禱，千祈唔好發生大事，否則政府一定倒瀉籮蟹！