每年年底煲呔曾上京述職，都係交功課嘅時候；今年煲呔曾施政報告劣評如潮，又爆出慳電膽同弟婦提早獲賠兩單醜聞風波，張成績表肯定畀人打晒交叉。適逢澳門十周年，煲呔曾要率團赴澳門觀禮，尋日傍晚獲中央領導人接見，「醜婦終須見家翁」，而煲呔曾亦提早腳軟，一到澳門就三魂唔見七魄，向記者講嘢時，竟然形容香港同澳門只係隔咗一條河，河、海不分，黑白顛倒，通識教育或者地理課本攞嚟做反面教材，一流！政府新聞處事後補鑊，出稿時自動謄正為「一海之隔」，咁就證明無鬧錯煲呔曾啦。

狂呻焗做政治騷博同情

煲呔曾去到澳門開口夾着脷，喺香港時就口沒遮攔！近年民望跌到阿媽都唔認得嘅佢，揀正喺見領導人前夕，接受電視訪問，為自己嘅差劣管治遮醜化妝，話○五年上任至今，民望唔算差，又扮晒可憐博同情，話入咗禮賓府後成日要做政治騷，初時好唔慣，依家唯一唔做騷就係同個孫女玩嘅時候；佢又自嘲早前入場睇東亞運足球時好興奮，係自己「失禁」，言下之意係嗰時先搵番自己，佢埋怨要喺中央同港人之間嘅夾縫中做人，總之呻到樹葉都落埋啦。

攞領導人德蘭修女講笑

最離譜嘅係，煲呔曾嗰把一得意就忘形嘅口哨嘴，講到興起，連中央領導人同德蘭修女都攞嚟講笑。佢話唔覺得每次見領導人時攞紙筆抄筆記冇面，仲話其實當佢講嘢時，領導人一樣有用簿仔寫低：「領導人都用簿仔寫字，唔通佢覺得無面咩？佢（指領導人）唔會覺得無面喎！只係唔喺鏡頭前寫之嘛，鏡頭一移開，又再寫過，但我好感謝佢（領導人）喎。換句話係尊重我講嘅說話。」連領導人都攞嚟講笑，唔話佢口沒遮攔都唔得！

講到長毛等社民連議員經常衝擊議事堂，主持問煲呔曾：每次遇到呢種情況，都見你隻手摷西裝袋，摷乜？煲呔曾話，係德蘭修女張相，大家以為佢會話每當想起德蘭修女就會平心靜氣，點知唔係，煲呔曾竟然話，長毛衝過去時，試吓用張相對住佢，睇吓靈唔靈喎。將德蘭修女講成符咒，咁大不敬，如果真係靈，第一個搵你煲呔曾先啦。