唉，香港愈來愈似一個高空擲物扑傻瓜樂園。白田邨有人掟大鐵錘，青衣邨有人掟電視機，家陣長亨邨又話掟個大型垃圾桶落街，其他扑傻瓜工具種類繁多，眼花繚亂，不能盡錄。

點解會係咁嘅呢？香港人幾時變得咁憤世嫉俗，係都要掟嘢落街禍及無辜？掟中貪官污吏或者江洋大盜就話好啫，萬一掟中自己嘅父母兄弟親戚朋友咁點算呢？最傷可能係掟中暗戀咗好耐又冇勇氣表白嘅秘密情人，走去醫院探人又唔敢，唔去醫院慰問又難忍。所以話啫，唔該啦，收手啦，ＰＫ。

至於講到更大殺傷力嘅擲物行為，當然係搞到全城聞風喪膽嘅連環鏹水彈事件。今時今日嘅香港，十足十「鏹戰世界」，冷血狂徒由旺角開始行兇，最近移師銅鑼灣，連同深水埗三宗擲鏹案，先後發生過七劑。由於犯罪學家認為，旺角同銅鑼灣嘅鏹魔好可能係同一人，而且犯案心態係要挑戰警方，肯定會再次出擊，所以功夫茶唔會話，收手啦，ＰＫ，而係會講，捉佢啦，傻豹。邊個係傻豹？笨手笨腳唔識破案嘅烏龍神探囉！

咦，咪住先，聽講傻豹為銅鑼灣一案懸紅三十萬元緝兇喎。等功夫茶計計數先，旺角出事之後，茫無頭緒嘅警方懸紅九十萬，假設冷血狂徒真係同一人，又假設有人能夠提供線索一網成擒，加加埋埋咪係一百二十萬？既然咁和味，如果功夫茶係鏹魔，好大可能會搵個拍檔，嗱，細佬，你做二五仔供我出去啦，百二萬賞金七三分帳！

當然啦，鏹魔如果真係存心挑戰警方，以禍及無辜嚟滿足變態心理，如無意外係唔會為咗賞金而自動獻身嘅。所以講到尾，始終都係要傻豹生生性性主動出擊。喂，唔好唔記得，聖誕就快到，然後係新年，跟住係農曆新年恭喜發財利是來，人人都諗住普天同慶，如果一個唔好彩去到蘭桂坊吃喝玩樂，居然有個鏹水彈從天而降，你話幾咁掃興！

吖，唔知係咪英雄所見略同呢，本報收到消息，警方真係鎖定中環蘭桂坊係下一個施襲嘅高危地點，家陣已經屯駐重兵嚴密布防。除咗蘭桂坊，銅鑼灣嘅渣甸坊，油麻地嘅廟街，尖沙咀嘅金馬倫道一帶，總之係人流密集嘅地方，而且附近有不設防嘅唐樓，亦都成為警方鎖定嘅目標，加派大量「人肉天眼」到實一實。

呢嗱，咁就啱嘞，將勤補拙吖嘛。鏹魔行兇一年，警方遲遲無法破案，如果唔想淪為笑柄，梗係要下定決心、不怕犧牲，理得佢行必行到腳震震，師兄師姐係要踏破鐵鞋日巡夜巡左右㗎喇。

點都好啦，佳節將近，禍患未除，唔想普天同慶變普天同，咁就有必要恭請傻豹大顯神威捉鏹魔！