由一班前中央政策組非全職顧問組成嘅新智庫群策學社尋日正式成立，群策學社主席、中華總商會副理事長方文雄就話希望透過學社組織有志之士，為政府做多啲嘢。學社成員來頭唔細，包括浸大工商管理學院院長張仁良、時富投資董事長關百豪同霍震霆長子霍啟剛等。成立不久，學社已向政府提出第一項建議，就係用一億喺東涌幾個地方種五百萬棵杜鵑樹，希望將香港打造成好似日本同韓國嘅賞花勝地，預計可為香港帶嚟三億幾旅遊收益。
方文雄同群策學社成員早前仲去咗東涌行咗兩次山，搵最適合地方嚟種呢批杜鵑，最後敲定咗四個地點，仲話發展局局長林鄭月娥聽完佢哋嘅意見後，覺得有得諗，遲啲會同區議會討論。
身兼西九文化區諮詢委員會主席嘅張仁良就話最近忙到癲，晚晚為咗傾西九諮詢，搞到八、九點先返屋企陪老婆食飯。好彩委任去到出年二月尾就完，之後仲做唔做公職，佢話要再諗諗，事關實在太困身喎！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |