一間學校能夠教出一個好學生當然值得高興，但如果可以教出個念舊嘅學生，就更加值得欣慰。尋日華仁書院喺會展搞畢業生聚餐，筵開一百席，畀大家返嚟敍舊之餘，順便又幫學校籌款。早前幫學校籌款幫到上台做大戲嘅醫管局主席胡定旭（肥胡）當然繼續撐母校，仲出錢出力，一口氣買咗八個呔夾。
肥胡尋日諗番讀書嘅日子，原來佢以前好調皮，成日都唔上堂去踢波，不過唔代表佢唔關心學校。當師弟捧住華仁嘅呔夾請肥胡慷慨解囊時，佢就毫不猶豫咁買咗八個，仲全部夾晒上身嚟以示瞓身支持添！除咗幫手買呔夾之外，肥胡仲預備咗一個籌款環節，就係百萬富翁。顧名思義，肥胡嘅目標就係想幫母校籌到一百萬善款。為咗呢個節目，肥胡仲特登早四個鐘到場熟習會展嘅電腦系統；有肥胡呢種咁有心嘅畢業生，相信歷任華仁校長實好自豪！