龔仁心尋晚喺以佢家姐命名嘅荃灣如心海景酒店大排筵席，盛傳力撐華懋基金嘅富商趙世曾，以及龔如心生前幾位得力助手吳崇武、區燕玲同王良煥都有到場恭賀，不過佢哋並唔係嚟預早慶祝華懋基金贏官司，而係祝賀龔仁心細仔龔皓嘅結婚之喜。

就係「拜拜」囉！

龔仁心喺婚宴場外表示，喺娶新抱嘅大喜日子，唔應該多講爭產官司嘅嘢，但講講吓龔仁心又忍唔住話，佢哋一方法理情兼備，相信官司結果應該係另一件喜事。

問及陳振聰會喺宣判嗰個禮拜五十大壽，龔仁心就話：「希望法官送個大禮畀佢，就係『拜拜』囉！」

龔仁心新抱係台灣人，新奶奶好鍾意呢位新抱。新老爺就祝願佢嘅乖仔同新抱兩個可以長長久久、白頭到老，最好就當然係快啲生番幾個孫畀佢玩。