本文重點
香港隊喺東亞運足球賽攞金牌，東亞運足球隊領隊羅傑承功不可沒，佢尋日喺馬場出現，卓妮梗係要去恭喜吓佢啦！羅傑承話除咗港隊攞到足球第一金嗰刻激動到流下男兒淚外，返到屋企心情仍然無法平復，成晚都開心到瞓唔着，最後搞到凌晨五點先瞓到。
前日卓妮都有睇港隊比賽，可以話係高潮迭起，最後拎到呢面金牌，都係靠羅傑承當機立斷，喺打入決賽後立即召回仲喺英國跟熱刺操練嘅陳肇麒（陳七）返嚟應戰。羅傑承話六萬蚊嘅來回機票，係佢掏腰包資助嘅，呢筆錢絕對值得使。
陳南祿：《東方日報》馬經貼士準
羅傑承帶領嘅港隊就為香港吐氣揚眉，但喺一年一度嘅國泰航空香港國際賽事，佢自己隻愛駒「羅馬奔騰」尋日就唔係太生性，最終三甲不入，不過相信影響唔到佢嘅好心情。
身為國泰航空非常務副主席，身兼馬會大董嘅太古中國主席陳南祿（Philip）尋日當然有去捧場，心情非常唔錯，還手執《東方日報》馬經研究，大讚貼士準。Philip話畀卓妮知，佢原來啱啱同班朋友喺敍利亞遊歷完返嚟，玩得不亦樂乎，就連聖誕節都唔打算去旅行，睇吓可唔可以抽時間寫番幾篇遊記咁話！
講開賽馬，早前卓妮撞到全國政協委員、東海聯合集團主席黃楚標，佢睇中兩匹新西蘭兩歲馬，結果早幾日就用四百萬元價錢投得其中一匹。標哥話，呢匹馬與其老友李榮翰旗下馬匹種類相似，表現和成績相當不錯。雖然普遍馬主都話今年馬匹競投價貴咗好多，但標哥就覺得一啲都唔貴，事關普遍拍賣馬都要四百至五百萬元喎！
卓妮