雖然前華懋集團主席龔如心嘅千億爭產案仲未有裁決，不過龔家嘅生活就無受官司影響，細佬龔仁心呢個星期日就會娶新抱，佢細仔龔皓會同女友陳金鳳拉埋天窗。當年有傳膝下猶虛嘅龔如心有意向育有兩子嘅龔仁心過繼一個，最後雖然無成事，做唔成「母子」，龔皓學成後依然返華懋幫手做IT、搞資訊科技工作，佢嘅婚禮仲揀咗喺荃灣嘅如心海景酒店舉行。
講到龔仁心，月初佢同台灣定航聯運董事長王天一、景民基金董事長耿志遠去咗福州、寧德同莆田等地考察，王天一係龔如心老友，年前仲作為龔家陣營首位證人，來港為爭產案作證。今次佢哋一行十三人組成嘅兩岸三地海西投資考察團，喺港澳辦安排下，睇咗當地嘅投資環境、政策同重點招商項目，福州巿委書記陳榮凱、莆田巿政協主席楊鵬飛同副巿長李飛亭仲分別會見考察團。睇嚟龔仁心喺內地都幾吃得開。