有工聯會「吳啟華」之稱嘅理事長吳秋北，上任大半年以來，為應付繁忙會務及應酬搞到私人時間大減，好少時間同家人共享天倫，為見多三名愛女幾面甘願做「苦爸爸」，每日晨咁早六點半起身，同女兒玩一輪先捨得返工。
吳秋北作為本港最大工會嘅統帥，今年九月捨棄醫管局份高薪厚祿，全情投入工會工作，旗下百多個屬會嘅會務樣樣都關佢事，會務已經忙得不可開交，仲要應付四方八面嘅應酬活動，難怪佢慨嘆道：「以前有份正職都可以推吓，依家無得推。」
不過俗語有云：「在其位，司其職」，吳秋北亦唔敢有半句怨言，但惟獨對三名愛女放心不下，寧願每朝六點半起身，先照顧就讀小學嘅大女返學，再陪多兩個細女耐啲，用佢嘅話講，就係同三個女搏殺一輪後，先拖住疲乏嘅身軀返工會處理會務同應酬，夜晚返到屋企，三個心肝寶貝已經覺覺豬喇。
見屋企人時間固然少，連佢自己喺北京社科院修讀嘅批評文學博士學位亦未有時間北上埋尾，所以仲未畢到業，睇嚟呢個工聯會ＣＥＯ真係一日要有四十八小時先夠用喇！