話說當年王冬勝所屬嘅銀行被傳擠提，散戶急急排隊攞錢，當時無槍無刀傍身嘅佢，大無畏揸住架公司車做運鈔員，一運就係三千萬。點知運運吓個錢袋穿咗，好在喺車入面發現，雖然搞到畀路過嘅人眼望望，但都有驚無險！運完鈔，公關了得嘅佢，即晚安排記者入銀行庫房，等大家見到佢哋銀紙充足，第二日又安排喺街度排隊嘅客戶去有冷氣歎嘅室內地方排隊，等條街無再出現嚇人人龍，前後三日就擺平件事。

不過，王冬勝話當年佢轉去滙豐，唔係僅為了不滿舊公司裁員，而係見到新公司喺內地發展嘅資源投放得好，關於當年裁員嘅事，佢話只係唔係咁認同個時間性喎；答得大方得體，等新舊僱主都留有面子。咁又係，年前滙豐受金融海嘯衝擊，炒人炒得都好狠！王冬勝公餘鍾意做運動，年紀大咗，由壁球轉打高爾夫球，仲經常與客戶對賽；佢話自己嘅打波哲學係「能贏則贏」，絕對唔會為討好客戶，刻意輸畀客戶喎。