Ricky（曾智明）款客嘅大閘蟹名叫「輝皇蟹」，來頭唔簡單。永富食品老闆陳錦輝話，輝皇蟹為野生大閘蟹，肉質特別甜，但輸蝕在肥膏少，所以搜捕回來後要放陽澄湖再養一段時間，谷肥蟹膏，變成蟹肉甜、膏又多。輝皇蟹大隻重身，每隻約六至七両，即每斤只有兩隻幾，以四百九十八元一斤計算，平均每隻要二百元。
揀大閘蟹秘訣，農曆九月揀蟹乸、十月搵蟹公呢啲基本功不用多說，輝哥仲教得深層次啲，話揀蟹要有金毛。無錯！靚蟹嘅腳毛略帶金色，跟住按吓隻腳仔，要夠實淨，再反轉個肚，肚身最好呈象牙色，當然蟹身要夠肥大；如果眼仔碌碌好精靈咁望住你，咁就要帶返屋企慢慢炮製佢嘞！
卓妮
