即係咁，壹淫媒《蘋果日報》喺台灣推出叫做「動新聞」嘅虛擬動畫，查實係掛羊頭賣狗肉，利用電腦技術販賣色情暴力，卒之激起社會公憤，幾十個民間組織浩浩蕩蕩操去壹淫媒抗議。台北政府眼見民憤極大，市長郝龍斌弘揚正氣，非常果斷向淫媒宣戰，三日之內以雷霆萬鈞之勢使出五招痛擊，包括連續施以巨額罰款，又禁止學校訂閱爛果報。

呢嗱，大家睇睇，台灣係咪邪不能勝正吖？民間固然集體向淫媒說不，連官府亦都順應民意遏止邪風，搞到誨淫誨盜嘅淫賤黎冇啖好食。本來，淫賤黎打算利用「無理干預新聞自由」呢一招含血噴人，後來諗諗下，發覺唔對路，眾怒難犯嘛，所以縮沙嘞。

如果話台灣係邪不能勝正，香港又點呢？可以咁講，香港係正義不彰，淫邪當道。

壹淫媒喺香港違反過《淫褻及不雅物品管制條例》幾多次呀？過百次。特區政府點樣處罰呀？最多嗰次罰款五萬，其餘咯喎，一萬幾千咁大把。

其實，香港民間組織同樣好似台灣咁怒吼過，譬如話，未執笠前嘅《壹本便利》刊登未成年少女李蘊濕身相，當時又係激起社會公憤，婦女團體又係浩浩蕩蕩操去壹淫媒抗議，結果呢？好不幸，香港冇正氣，官僚冇良心，一個二個隻眼開隻眼閉，再一次包庇縱容淫賤黎。

今次見到台灣棒打淫媒，受害人李蘊自己有乜感想呢？佢話呀，傳媒應該自律，唔應該為求銷量而發布淫褻、不雅及暴力資訊，以免教壞青少年。

唉，淫邪傳媒得到包庇縱容都算嘞，正義傳媒又有乜嘢待遇呢？居然係選擇性檢控，居然係無理滋擾，居然善有惡報。

二○○五年底，《東方日報》及《太陽報》刊登一輯Kelly Brook沙灘性感照，打晒格仔嘅，仍然被淫審處評為二級不雅，但係《蘋果日報》刊登同一輯照片，只係評為一級非不雅。更古怪嘅係，喺香港有售嘅外國雜誌《NOW》刊出Kelly Brook裸照，格仔都冇打，亦冇包膠袋，竟然連送檢都冇，更加唔使講評級。同一輯照片，竟然有三重標準，唔係選擇性檢控係乜？

前年十一月，大埔警署情報組探員高調踩上報館，話有人投訴《太陽報》有篇「一年前」專欄文章涉嫌鼓吹暴力，要求提供作者資料，並且交代審批機制。喂，家陣原來仲有文字獄，唔係無理滋擾係乜？

「香港拉登」馬照聲事件中，東方報業集團義助警方將佢繩之於法，佢出獄後不斷恐嚇以及抹黑東方，警方居然當睇唔到，唔係善有惡報係乜？最終東方需自費巨款展開民事追討。

所以話啫，邪不能勝正呢支歌仔只可以喺台灣有得唱，喺香港，正義傳媒永遠得唔到公平待遇！