尋日下午五點幾，卓妮喺「闊太勝地」置地廣場撞到六嬸置新裝，同行仲有兩位女性友人。年屆七十五歲嘅六嬸着住一條雪白連身裙襯白絲襪及白鞋，外加一件牛仔褸，活力十足。卓妮見六嬸早有心水，一個箭步標入Fendi店內睇新裝，瞄準大方巾、頸巾及手袋出擊，仲叫店員攞本新裝目錄畀佢過目，揀揀吓衫電話響起，六嬸唔理咁多，一於用肩膊夾住個iPhone繼續揀衫，仲畀佢發現一條新款皮草頸巾，忍唔住用手來回輕掃，感受吓滑不留手嘅毛質，揀得興起時，搵埋友人做「人肉衣架」，將頸巾掛喺友人頸上睇吓襯唔襯。

廿分鐘買三條

Fendi以出品超柔軟皮草聞名於世，其中以松鼠毛及山羊毛縫製而成嘅手袋，成闊太指定收藏之物，Fendi嘅皮草圍巾及頸巾更係高貴點綴品，難怪六嬸一睇見就雙眼發亮。揀足廿分鐘後，六嬸碌卡掃咗三條頸巾，使咗幾多錢佢無講，不過Fendi頸巾一條上等羊毛頸巾賣一萬九千幾元，皮草頸巾每條更達廿幾萬元。六嬸離開時，友人幫佢拎戰利品，卓妮上前打招呼問佢買乜，佢笑騎騎話：「出來行吓街，買吓東，買吓西！」估計六嬸廿分鐘內至少使咗幾萬元，果然豪得起！

卓妮