「白姐姐」白韻琴做人一向夠放，睇佢前日失驚無神開記者會、揚言一旦泛民五區總辭，佢會參加立法會補選挑戰長毛梁國雄就知道。講開又講，早排白姐姐喺銅鑼灣現身，一身悉心打扮同戴住白帽嘅佢，喺百德新街等老公「法律超人」謝偉俊（Paul）接送，當街當巷半隻燒鵝髀「得」上欄杆講電話，形態相當奔放。
話說當晚七點幾，我哋喺百德新街見到白姐姐，當時四周遊人不少，只見佢頭戴白帽，身穿白褲、白鞋，再加一件「花呢碌」嘅恤衫，遠遠就認得出佢。不過，白姐姐最搶眼嘅，唔係衣着打扮，而係佢嗰份豪邁個性，白姐姐攞住手袋，挨喺欄杆旁邊摷個不停，當佢摷咗個電話出嚟，等咗一陣，開始按捺不住，懶理身邊路人，將右腳大髀放上欄杆，一邊講電話，一邊鵝髀曬月光。白姐姐平時會講三級笑話同疑似粗口搞氣氛，佢講同做都咁放，果然言行好一致！
白姐姐講完電話後，阿Paul終於飛的士趕到，仲落車行一段路去會合白姐姐，帶佢返回原先部的士；阿Paul仲好有紳士風度，開埋車門畀白姐姐上車，同的士上嘅友人一齊離開，認真唔話得！