肥亨咁淡定係因為「心中有數」，佢同我哋講，今次杜拜世界涉及嘅債務問題只係五百九十億美元，同金融海嘯嘅金融災難冇得比。佢羅列金融海嘯爆發之初嘅數據，好似教書咁話，美國政府為咗挽救ＡＩＧ集團，前後動用咗一千八百億美元；全球銀行因為金融海嘯帶來嘅壞帳，更高達八千億美元，同呢啲天文數字相比，杜拜嘅危機就細好多啦！

不過，杜拜危機爆出後，環球股市都跌得四腳朝天，港股上周五單日更直插千點，肥亨話小心係好事，不過都補上一句：「市場嘅反應都過敏咗！」佢解釋，杜拜世界家吓只係話要重組債務，仲未話會賴帳，債權人未必要全部撇帳，所以講唔上五百九十億美元貸款凍過水。重返商界肥亨既係上市公司高層，又係大學教授，分析起世界經濟形勢時理論同實際兼重，睇嚟呢個新身份好適合佢噃！