警方派女臥底潛入中華基督教會基新中學調查粉嶺區販毒情況，但可惜「做漏招」無向法庭申請保密頒令，連累校名曝光，學校好希望教育局可為學校作出澄清。教育局局長孫明揚前日出席工聯會職業發展服務中心開幕禮，活動完咗就走，講明唔回應呢單嘢；尋日孫公出席一個由教育局舉辦嘅新中學教學語言政策交流會後，成班記者又等住佢回應呢單嘢，點知佢見住一大堆「咪兜」，繼續堅持封口，直行直過「唔上身」！咁又係，呢單嘢係警方搞出嚟嘅蘇州屎，無理由要由孫公嚟揹埋一份。
不過，講到教育嗰份，孫公就滔滔不絕，好似尋日嘅「知識薈萃2009」英語與學科學習交流會咁，孫公致詞，不忘交代一下新中學教學語言政策嘅進展，仲拋吓書包，話想同大家分享十八世紀德國詩人兼思想家Gotthold Ephraim Lessing嘅至理名言，嗰句名言嘅中文意思係：「人的價值並不取決於是否掌握真理或者自認為真理在握，而是在於追求真理那種孜孜不倦的精神。」
之後，孫公又引述《論語》話：「學而不思則罔，思而不學則殆」，提醒學生追求學問和真理嘅道路曲折漫長，必須要有毅力先能夠成功，學習英語亦一樣，要引發興趣，清晰了解學習目的及把握運用英語嘅機會，自然學有所成。