依家政府規管網上銷售健康食品，法例多，執行少，過去五年，每年嘅檢控數字只有一至五宗。梁家騮聽到呢堆數字，笑笑口話難以置信，以佢為例，每日已經收到至少三宗偉哥推銷廣告啦，問衞生署會唔會連電郵促銷廣告都規管埋。

怪醫咁玩得，連咁私隱嘅事都攞出嚟講，食物及衞生局副局長梁卓偉就一臉嚴肅回答：「我要澄清，好少收到壯陽藥廣告。」話如果收到，會向衞生署投訴跟進，叫梁家騮都咁做。梁卓偉嘅訊息好清晰，都係話畀人聽，佢唔食偉哥嘅。