蛋糕美食到會

賭王以前過生日，佢一個人為咗陪伴各位太太，往往分身乏術，今年佢嘅生日喺醫院度過，情況就好唔一樣。前晚三太陳婉珍同四太梁安琪一齊喺醫院陪伴賭王至凌晨迎接生日，二太藍瓊纓尋日現身，仲帶嚟超巨型果籃。各房子女亦分別帶咗蛋糕同各種美食，淨係蛋糕都有兩種，包括梁安琪帶嚟嘅天使蛋糕同媳婦羅秀茵親手做嘅芝士蛋糕，睇嚟賭王今年嘅生日會，係一場盛宴。

超雲派司機除咗送來美食，仲送咗一束鮮花。據了解，何超儀送咗佢自己嘅唱片Ｔ恤同佢老公陳子聰隊樂隊「廿四味」嘅Ｔ恤畀爸爸做禮物。

向來對傳媒不薄嘅何家，尋日特別為傳媒安排豐富嘅飯菜，每位傳媒均獲贈一個巨型壽包，讓大家都沾染到賭王生日嘅歡樂氣氛。

何超雲（右）密實裝扮為賭王賀壽。

何超儀送自己嘅唱片Ｔ恤畀爸爸做禮物。